ភ្នំពេញ៖ អាជ្ញាធរជាតិអប្សរា បានប្រកាសនៅថ្ងៃអង្គារ ទី៤ ខែកុម្ភៈ ថាការផ្តល់ចំណីជាប្រចាំរបស់ក្រុមបុគ្គលមួយចំនួនតូច ក្នុងគោលបំណងផលិតមាតិកាជាប្រយោជន៍ផ្ទាល់ខ្លួន បានផ្លាស់ប្តូរនូវទម្លាប់រស់នៅបែបធម្មជាតិរបស់សត្វស្វា ពីសត្វព្រៃ ទៅជាសត្វស្រុក ដែលមានចរិតកាច ចេះដណ្ដើមចំណី និងឈានរហូតដល់ការបង្កជារបួសស្នាមទៅលើមនុស្សជាដើម។ នេះបើយោងតាមសេចក្តីប្រកាសព័ត៌មានរបស់អាជ្ញាធរ។

អាជ្ញាធរជាតិអប្សរាបានកត់សម្គាល់ពីការកើនឡើងនៃចំនួនសត្វស្វានៅក្នុងតំបន់អង្គរវត្តនាពេលថ្មីៗនេះ។ ដើម្បីដោះស្រាយបញ្ហានេះ អាជ្ញាធរបាននឹងកំពុងសហការយ៉ាងជិតស្និទ្ធជាមួយស្ថាប័នជំនាញនានាក្នុងក្រសួងកសិកម្ម រុក្ខាប្រមាញ់ និងនេសាទ រួមទាំងរដ្ឋបាលព្រៃឈើ និងមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប។ កិច្ចប្រជុំជាបន្តបន្ទាប់ត្រូវបានកោះប្រជុំដើម្បីពិភាក្សា និងអនុវត្តវិធានការចាំបាច់នាពេលអនាគត។

កន្លងមក ទាំងអាជ្ញាធរជាតិអប្សរា និងស្ថាប័នជំនាញទាំងនេះ បានចេញសេចក្តីប្រកាសព័ត៌មាន ដាស់តឿនសាធារណជននៅឱ្យឆ្ងាយពីសត្វស្វា កុំឲ្យចំណីសត្វស្វា និងជៀសវាងប៉ះពាល់ ឬលេងជាមួយសត្វស្វាជាដើម។ 

អាជ្ញាធរសូមអំពាវនាវដល់សាធារណជន ក៏ដូចជាភ្ញៀវទេសចរណ៍ជាតិ និងអន្តរជាតិ មគ្គុទ្ទេសក៍ទេសចរណ៍ និងប្រតិបត្តិករទេសចរណ៍ក្នុងខេត្តសៀមរាប ផ្សព្វផ្សាយព័ត៌មានសំខាន់ៗនេះ និងទប់ស្កាត់រាល់សកម្មភាពដែលអាចបង្កបញ្ហាកាន់តែធ្ងន់ធ្ងរដល់សត្វស្វា។

ជាងនេះទៅទៀត អាជ្ញាធរជាតិអប្សរានឹងបន្តកិច្ចសហប្រតិបត្តិការជាមួយនាយកដ្ឋានពាក់ព័ន្ធក្នុងក្រសួងកសិកម្ម រុក្ខាប្រមាញ់ និងនេសាទ ដើម្បីបង្កើតដំណោះស្រាយសមស្រប ដើម្បីកាត់បន្ថយជម្លោះជាមួយសត្វស្វានៅក្នុងឧទ្យានអង្គរ។